رشت (Rasht)
- Mar 16, 2018
- 2 min read
رشت صوبہ گیلان کا دارلخلافہ ہے جو ایران کے شمالی حصے میں واقع ہے ۔ اس کا شمار ایران کے خوبصورت ترین شہروں میں ہوتا ہے ۔ یہ شہر سطح سمندر سے سات میٹر پستی پر واقع ہے اور بندرگاہ انزلی سے اس کا فاصلہ صرف 15 کلو میٹر ہے ۔ بحیرہ خزر کے کنارے واقع ہونے کے ساتھ علاقے کا صنعتی مرکز بھی یہی شہر ہے ۔ سمندر کے کنارے ہونے کی وجہ سے یہاں ہوا میں نمی کا تناسب بھی زیادہ ہوتا ہے ۔ گذشتہ چند سالوں میں اس شہر کی آبادی میں کافی اضافہ ہوا ہے جس کی وجہ سے شہرسے ملحقہ خوبصورت علاقے آبادی کی لپیٹ میں آتے جا رہے ہیں ۔
تہران سے اس کا فاصلہ 324 کلو میٹر ہے اور ان دونوں شہروں کو جدید موٹروے کے ذریعے ملایا گیا ہے ۔ ہر ہفتے کے اختتام اور چھٹیوں میں تہران سے سیاحوں کی ایک بڑی تعداد یہاں تفریح کے لیے آتی ہے ۔ آب و ہوا میں تبدیلی اور دلکش مناظر دیکھنے کے لیۓ یہ ایک بہترین جگہ ہے ۔ بیرونی ممالک سے آنے والے سیاحوں کے لیے یہ راحت بخش مقام ہے ۔ اس شہر کو بہت جدید سڑکوں کے ذریعے ارد گرد کے شہروں سے ملایا گیا ہے ۔
شہر میں تعمیرات کے لحاظ سے کوئی قابل قدر عمارت تو نہیں ہے مگر قدرتی خوبصورتی کے ساتھ ساتھ دلچسپی کی بہت سی دوسری چیزیں یہاں موجود ہیں ۔ رشت میں ریشم کی فیکٹری ،چاۓ کی فیکٹری ،ڈھلوان زمین پر کاشت کی ہوئی چاول کی فصلیں اور پتھریلی زمین پر سرسبز کھیت قابل دید مقامات ہیں ۔ دریاۓ خزر کے ساتھ عمارات اور فارم ہاؤسز ایرانی معماری کا بہترین نمونہ پیش کرتے ہیں ۔
رشت نے چودھویں صدی عیسوی میں ایک شہر کی شکل اختیار کرنا شروع کی جب صوبہ گیلان سے لوگوں نے یہاں آ کر آباد ہونا شروع کر دیا ۔ اس شہر پر روس نے متعدد بار قبضہ کیا اور 1668 ء میں Cossack brigand stenka razin کے باغیوں نے شہریوں کا بڑی تعداد میں قتل عام کیا ۔ پہلی جنگ عظیم میں روس نے دوبارہ قبضہ کر لیا اور 1920 ء میں Bolsheviks نے بازار کا بیشتر حصہ تباہ کرنے کے ساتھ مقامی آبادی کو شہر چھوڑنے پر مجبور کر دیا ۔ آج کل رشت چاول اور ریشم کی صنعت کے حوالے سے مشہور ہے ۔
شہر کے تین بازار ،ڈاکٹر شریعتی ،سعدی اور امام خمینی وسطی چوک (شھداء) میں آ کر ختم ہوتے ہیں ۔ اس چوک کے گرد دلچسپی کی بہت چیزیں ہیں اور ہوٹل بھی تھوڑے ہی فاصلے پر موجود ہیں ۔ اس علاقے کی ایک پہچان یہاں کے چاۓ خانے ہیں جو اپنی انفرادی خصوصیات کی وجہ سے بہت شہرت کے حامل ہیں ۔ سبزہ میدان سے 250 میٹر کے فاصلے پر میوزیم ہے جہاں نادر اشیاء سیاحوں کی منتظر ہیں ۔ اس کے علاوہ شہر کے بازار بھی خریداری کے لیۓ سیاحوں کی توجہ کا مرکز رہتے ہیں ۔
پیشکش: شعبۂ تحریر و پیشکش تبیان
Comments